ᐊᐣᑕᔚᐣᐦᐃ ᐁᐏᒋᑭᐍ ᐅᑕᐱᓇᒪᐣ ᓂᒪᒪ ᐅᑎᔑᑭᔑᐍᐏᐣ ᒷᔦ ᐃᐡᑿᓭᐠ
ᓂᒪᐊ ᐏᐣ ᐃᐡᑿᔭ ᐨ ᒣᑿᐨ ᐱᒪᑎᓱᐏᓂᐠ ᐃᒪ ᓂᑎᐯᐣᒋᑫᐏᓇᐠ ᒥᑐᓂ ᑲᔭᓂᔑᓂᓂᒧᐨ
ᐅᐘᐍ ᓂᐡᑕᒼ ᐊᐏᔭ ᑲᑕᔑᒪᑲᓄᐨ ᐅᒪ ᑎᐸᒋᒧᐏᓂᐠ ᐊᒥᐦᐊᐍ ᑲᑭᐃᓯᓭᐨ ᕑᐅᔐᓫ ᑊᕑᐊᐠ ᐊᓂᔑᓂᓂᐏ ᑲᔦ ᐁᑿ ᓹᐢ-ᑭᕑᒪᐣ ᑲᔦ ᐃᔑᐊᔑᒋᑭᑭᓄᓂᑯᓯ᙮ ᑭᔭᐱᐨ ᐏᑕᒪᑫᐏᓇᐣ ᐏᑭᑫᐣᑕᒪᓂᐣ ᐃᑵᓂᐘᐣ ᐅᒋ ᓂᐡᑕᒼ ᐊᐏᔭ ᑎᐸᒋᒧᐏᓇᐣ, ᐘᐸᑕᐣ ᐃᐍ ᒧᔕᐠ ᑲᐃᔑᑲᑵᑎᐍᓇᓂᐘᐠ the FAQ᙮
Read the column in English here.
ᐅᑕᓇᐠ ᑲᑭᐱᔭᐦᑭᐘᑭᐸᐣ ᓂᑭᐘᐸᑕᒧᐘᐣ ᒪᓯᓇᐦᐃᑲᓀᐦᓯᓂ ᐃᒪ ᓂᒪᒪ ᐅᑕᔑᑫᐏᐣᑲᒥᑯᐠ ᐊᒥᑕᐡ ᐁᐃᔑᓂᑲᑌᓂᐠ ᐱᑕᓯᓂᐠ ᐊᓂᔑᓂᓂᒧᐏᐣ᙮ ᓂᑭᐊᔭᑎᓀᑭᓇᐣ ᑕᐡ ᐃᐍ ᐁᑲᓇᐘᐸᑕᒪᐣ ᐁᑿ ᒪᐘᐨ ᓂᑭᐏᒋ ᑭᒋᓇᑕᐍᐣᑕᐣ ᐃᐍ᙮
ᐊᓂᔑᓂᓂᒧᐏᐣ (ᐊᓂᔑᓂᓂᒧᐏᐣ) ᐊᒥᐍᓂ ᓂᒪᒪ ᓂᐡᑕᒼ ᐅᑎᔑᑭᔑᐍᐏᐣ᙮ ᓂᑎᐯᐣᒋᑫᐏᓂᐠ ᐅᑎᔑᑭᔑᐍᐏᓂᐘᐣ ᐊᐸᑕᐣ ᐃᐍ ᑭᐍᑎᓄᐠ ᐅᐣᑌᕑᐃᐅ ᐁᑿ ᐸᐸᑲᐣ ᐃᓀᑫ ᐃᒪ ᒪᓂᑐᐸ᙮
ᔕᑯᐨ ᐊᑎᐟ ᐃᑭᑐᓇᐣ ᑲᑭᔑᐊᔭᒥᐦᐃᐡᐸᐣ ᒣᑿᐨ ᑲᔭᐘᔑᔑᐘᑭᐸᐣ — "ᓂᐏᐏᓯᐣ", "ᐁᑿ ᓂᐸᐣ", "ᐱᔕᐣ" — ᓂᑭᑲᐡᑭᑐᐣ ᒋᓂᐦᓯᑐᑕᒪᐣ᙮ ᓂᑲᐏᔭᐢ ᑕᐡ ᐃᐍ ᒪᓯᓇᐦᐃᑲᐣ ᐁᑭᐏᒋ ᑭᒋᐸᑯᓭᓂᒧᔭᐣ ᒋᐱᒥᑭᑭᓄᐦᐊᒪᓯᔭᐣ᙮
ᑭᔑᑲᐣ, ᐱᓱᒧᐠ ᐁᑿ ᐊᐦᑭᐣ ᑭᔭᓂᐱᒥᓭᐘᐣ, ᐁᑿ ᐃᐍ ᒪᓯᓇᐦᐃᑲᐣ ᑭᔭᐦᑌ ᐃᒪ ᐊᒋᑲᓇᑎᑯᐠ, ᐁᔭᓂᐱᑯᑌᐘᐠ᙮ ᐁᓇᑕᐍᐣᑕᑿᐠ ᒋᔭᓂᔑᓂ ᓂᒧᔭᐣ ᑕᐦᓱᑭᔑᑲ ᓂᐱᒪᑎᓱᐏᓂᐠ ᑲᐏᐣ ᒋᑕᑿᐠ᙮ ᑲᐏᐣ ᐊᐏᔭᐠ ᒋᑌᑎᐸᐡᑲᐏᔑᐘᐨ ᓂᑎᐯᐣᒋᑫᐏᓂᐠ ᐊᐏᔭᐠ ᓇᐣᑕ ᓂᑐᑌᒪᐠ ᐃᐍᓂ ᑲᐃᔑᑭᔑᐍᐘᐨ᙮ ᑐᑲᐣ ᒥᔑᐣ ᐊᓂᔑᓂᓂᒧᐏᓇᐣ, ᐊᓂᔑᓂᓂᒧᐏᐣ ᐊᔕ ᑕᑭᐏᒋ ᐘᓂᐦᒋᑲᑌ᙮
ᐃᐍ 2016 ᒪᐘᑐᐘᓯᓇᐦᐃᑫᐏᐣ ᐃᐍ ᐅᒋ ᐊᓂᔑᓂᓂᐏᐱᒪᑎᓱᐏᓂᐠ ᑲᐃᔑᓇᑿᐠ ᐘᐸᑕᐦᐃᐍᒪᑲᐣ 16 % ᐁᐦᑕ ᐊᓂᔑᓂᓂᐘᐠ ᐅᒪ ᑲᓇᑕ ᐁᑲᐡᑭᑐᐘᐨ ᒋᔑ ᐊᔭᒥᐘᐨ ᐅᑎᔑᑭᔑᐍᐏᓂᐘᐠ — 5 % ᒥᓂᑯᐠ ᑲᓇᔑᓭᐠ ᐃᐍ ᒥᓂᑯᐠ ᑲᔭᐱᒋᓭᑭᐸᒼ ᒣᑿᐨ 2006 ᑲᑭᔭᐦᑭᐘᑭᐸᐣ᙮
ᐅᑕᓇᐠ ᑲᑭᒥᑕᓱᒥᑕᓇ ᐊᐦᑭ, ᐊᓂᔑᓂᓂᒧᐏᓇᐣ ᐱᒥᐘᐘᓂᒋᑲᑌᐘᐣ᙮ ᐅᐍ ᑕᐡ ᐁᑭᑫᐣᑕᒪᐣ ᒪᐘᐨ ᓂᑭᑭᓯᑯᐡᑲᑯᐣ᙮ ᐁᑿ ᐊᐦᐱᐣ ᓂᔑᐱᓱᒼ ᐅᑕᓇᐠ, ᓂᑭᐘᐸᑕᐣ ᓂᐡᓇᐯ ᐊᐢᑭ ᐅᑯᒪᐏᓇᐠ ᐁᑭᑿᔭᑎᓇᒧᐘᒋᐣ ᓂᑯᑢᓱ ᐱᐃᑯᓇᑲ ᑭᑭᓄᐦᐊᒪᑫᐏᐣ ᐃᐍ ᐊᓂᔑᓂᓂᒧᐏᐣ᙮ ᐅᐍ ᑭᑭᓄᐦᐊᒪᑫᐏᐣ ᑭᒧᐦᒋᒥᑵᓇᓂᐘᐣ ᐁᑿ ᑭᑕᐏᓭᓭ ᐊᐘᓀᐣ ᐱᑯ ᒋᑭᐏᑕᐱᓇᐠ ᐃᐍᓂ᙮.
ᒣᑿᐨ ᐯᔑᑯᔕᑊ ᑲᑕᓱᔭᐦᑭᐏᓀᐸᐣ, ᓂᒪᒪ ᐁᑿ ᐅᑎᐯᐣᒋᑫᐏᐣ ᐱᑿᒋᔭᐦᐃᐠ ᑭᑕᔑᐸᐸᒪᑎᓱᐸᓂᐣ ᒣᑿᐨ ᑲᓂᐱᓂᓂᐠ ᐁᑿ ᑲᐱᐳᓂᓂᐠ ᐅᑲᐯᔓᓂᑫᐏᓂᐘᐠ ᐃᒪ ᓄᐱᒥᐠ ᑭᐍᑎᓄᐠ ᐅᐣᑌᕑᐃᐅ᙮
ᐁᑿ ᐊᐦᐱᐣ, ᐅᑯᒪᐏᓇᐠ ᐅᑭᐱᑿᐦᑐᓇᐘᐣ ᐅᑕᔑᑫᐏᓂᓂ ᐊᐦᐱᐣ ᐁᑭᐃᐡᑯᓂᑲᓂᐘᐠ᙮ ᐅᐱᒪᑎᓱᐏᓂᐘᐣ ᑭᔭᒋᓭᓂ ᐊᐦᐱᐣ ᒥᑐᓂ᙮ ᑲᐅᐡᐡᑭᓂᑯᑵᐏᐦᐸᐣ, ᓂᒪᒪ ᐅᑭᐸᑲᒥᐡᑲᑯᓇᐣ ᒥᔑᐣ ᐊᓂᒥᓭᐏᓇᐣ ᐁᑿ ᐅᑭᓇᑲᑕᐣ ᐅᑕᔑᑫᐏᐣ ᐁᑭᐣᑕᐏᑭᑭᓄᐦᐊᒪᑯᓯᐨ ᑭᒋᑭᑭᓄᐦᐊᒪᑐᐏᑲᒥᑯᐠ ᒥᔑᐣᒥᑕᓱᒥᑕᓇ ᑎᐸᐦᐊᑲᐣ ᓂᑲᑌ ᐁᑭᔭᐱᓯᓇᑿᓂᓂᐠ᙮
ᐁᑭᐯᔑᑯᐨ ᐁᑿ ᐁᑭᑯᑕᒋᐨ, ᑭᐃᑭᑐ ᐁᑭᑲᑵᑭᑫᐣᑕᑭᐣ ᑫᑯᓇᐣ ᐍᒥᐦᑎᑯᔑᒧᐏᓂᐠ ᑭᔭᓂᒪᓂᓂ᙮ ᐅᐍ ᑲᑵᒋᐦᐃᐍᐏᐣ ᐅᓴᒼ ᐊᐦᐱᐣ ᑭᔭᓂ ᐊᓂᒪᓂᓂ ᐁᑿ ᐊᐱᑕᐏᔭᐦᑭ ᒣᑿᐨ ᑲᑭᑭᓄᐦᐊᒪᑐᐏᔭᐦᑭᐘᐠ, ᑭᐳᓂᐃᐡᑯᓄ ᐁᑿ ᑭᑭᐍ ᐊᐦᐱᐣ ᐃᐍᑎ ᐅᑎᐡᑯᓂᑲᓂᐠ᙮
ᑲᐃᐡᑿ ᐏᑭᑐᐘᒋᐣ, ᓂᓂᑭᐦ ᐃᑯᐠ ᑭᑭᐍᐡᑲᐘᐠ ᐃᐍᑎ ᐱᑿᒋᔭᐦᐃᐠ ᐁᑭᐣᑕᐏᑕᔑᐱᒪᑎᓯᐘᐨ᙮ ᐊᒥᑕᐡ ᑲᐃᑭᑐᐘᐨ ᒪᐘᐨ ᐁᑭᐊᓂᒪᐠ ᐃᐍ ᑲᑭᔑᐃᓀᐣᑕᒧᐘᐨ ᒋᑐᑕᒧᐘᐨ, ᔕᑯᐨ ᐊᒥ ᑲᓂᑕ ᑐᒋᑲᑌᐠ ᐊᐦᑯ ᐃᑵᓂᐘᐠ ᒥᔑᐣ ᐊᓂᔑᓂᓂᐏ ᐅᑯᒪᐏᓇᐠ ᑎᐯᐣᒋᑫᐏᓇᐣ ᑲᑲᑵᑌᐱᓇᒧᐘᒋᐣ ᑭᑭᓄᐦᐊᒪᑫᐏᓂᓂ᙮ ᓂᒪᒪ ᑭᐃᔑ ᐸᑭᑎᐣᑎᐃ ᒥᓯᐍ ᐃᒪ ᐍᒥᐦᑎᑯᔑᒧᐏᓂᐠ ᐊᐦᑭᐠ᙮ ᑭᑭᒋ ᐊᓄᐦᑭ, ᐅᑭᑭᐡᑐᐣ ᑭᒋᑭᑭᓄᐦᐊᒪᑐᐏᓂᐠ, ᐁᑿ ᓇᑫᓇᐘᐨ ᐅᑭᐊᓂ ᑌᐱᓇᐣ ᐃᑵᓂᐘᐣ ᓂᐃᐣ ᑭᒋᑭᑭᓄᐦᐊᒪᑫᐏᓂᐠ ᒪᓯᓇᐦᐃᑲᓀᐦᓴᐣ᙮
ᔕᑯᐨ ᐃᐍᓂ ᑲᑭᑐᑕᐠ, ᐅᑭᐸᑭᑎᓇᓇᐣ ᐅᑲᔭᔓ ᐱᒪᑎᓱᐏᐣ᙮
ᑭᑭᓄᐦᐊᒪᑯᓯᓇᓂᐘᐠ ᑭᒋᐃᐡᑯᓄᑲᒥᑯᐠ ᑲᑭᐏᒋᐦᐃᐍᒪᑲᐠ ᐃᒪ ᐁᐦᑕ ᐍᒥᐦᑎᑯᔑᒧᐏᓂᐠ ᑲᐃᔑᑭᔑᐍᐘᐨ ᐊᐏᔭᐠ ᐁᑿ ᑲᐃᔑᐘᐍᓇᐦᒋᑲᑌᑭᐣ ᑭᑭᓄᑊᐦᐊᒪᑫᐘᓯᓇᐦᐃᑫᐏᓇᐣ, ᑲᐏᐣ ᐏᑲ ᒋᐏᒋ ᐊᐸᒋᑐᐨ ᐅᑕᓂᔑᓂᓂᒧᐏᐣ᙮
ᐱᓯᐣᑕᐣ ᐃᐍ ᕑᐅᔐᓫ ᑊᕑᐊᐠ ᐅᒪᒪᒪᐣ, ᓫᐃᐣᑕ, ᐏᑕᒥᑎᓯ ᐊᓂᔑᓂᓂᒧᐏᓂᐠ᙮
ᑫᑲᐟ ᒧᔕᐠ ᑭᒧᒋᐍᒥᐦᑎᑯᔑᒧ ᐃᒪ ᓂᑎᐯᐣᒋᑫᐏᓇᐠ ᔕᑯᐨ ᓴᑭᐦᐃᐍᐃᓂᐠ ᐸᑭ ᐊᓂᔑᓂᓂᐏ ᐃᑭᑐᐏᓇᐣ ᐅᑭᐊᐸᒋᑐᓇᐣ ᐃᒪ ᑕᐦᓱᑭᔑᑲ ᓂᑕᔭᒧᐏ ᓂᓇᐠ᙮ ᔕᑯᐨ, ᑲᔭᓂ ᐱᒥᓭᐠ ᓂᑲᓂᐠ, ᑲᔭᔭᒥᓇᓂᐘᐠ ᐃᒪ ᓂᑲᐯᔓᐏᓂᓇᐠ ᑭᔭᓂ ᐱᒥ ᐊᓂᒪᐣ ᐏᓀᐦᑕ ᐁᑭᑲᐡᑭᑐᐨ ᒋᔭᓂᔑᓂᓂᒧᐨ᙮
ᒣᑿᐨ ᐊᔭᑲᔐᔑᔭᐸᐣ, ᓂᑎᐯᐣᒋᑫᐏᓇᐣ ᓂᑭᐃᔕᒥᐣ ᐘᒐᐡᑯᑯᓂᒥᐠ ᐊᓂᔑᓂᓂᐏ ᐅᑯᒪᐏᓇᐠ ᑕᐦᔁ ᓂᔓᔭᐦᑭ ᒣᑿᐨ ᑲᒪᑯᔐᑭᔑᑲᐠ ᓇᐣᑕ ᒣᑿᓂᐱᐣ᙮ ᓂᑭᓂᐦᑕ ᑕᓇᑊ ᐱᐠᓯᑲᒥᑯᐠ ᐁᓇᑐᑕᐘᑿ ᑲᒪᐅ ᓇᓄᑕᑯᓯᐘᐨ ᓂᐘᑯᒪᑲᓇᐠ ᑲᔭᔭᒥᐘᒋᐣ ᐊᓂᔑᓂᓂᒧᐏᓂᐠ᙮ ᑲᐏᐣ ᐏᑲ ᒋᑭᐏᒋ ᑭᔑ ᐊᔭᒥᐦᐃᑎᔭᐠ ᑯᒼᔓᒼ, ᓂᒥᐦᔓᒼ, ᐁᑲ ᐁᑭᐏᒋᑭᑫᐣᑕᐠ ᐍᒥᐦᑎᑯᔑᒧᐏᓂᓂ᙮
ᓂᑲᓄᑫ ᑲᑭᓂᐦᑕ ᐸᐦᐱᓭᐸᐣ ᐁᐃᑭᑎᐨ ᓂᑕᓂᔑᓂᓂᒧᐏᓂᐠ ᓂᑎᔑᓂᑲᓱᐏᐣ "ᐘᐸᐣ" ᐃᒪ ᓂᐦᑕᐘᑲᐠ ᒣᑿᐨ ᑲᑭᒥᒋᒥᐣᔑᐨ᙮ ᒥᔑᓂᐘ ᓂᑭᐏᑕᐱᒪ ᓇᓂᔭᐦᐃ ᐁᑲ ᐁᑭᑎᔭᐠ ᑫᑯᐣ ᒣᑿᐨ ᐁᑲᓇᐘᐸᑕᐠ ᑫᑌ ᒪᓯᓇᑌᐢᒋᑲᓇᐣ ᒥᓴᐘᐨ ᐁᑲ ᐁᓂᐦᓯᑐᑕᐠ ᐃᑭᑐᓇᐣ᙮
ᓂᑲᓄᑫ ᓇᓂᔭᐦᐃ ᐁᐏᑕᐱᒪᑭᐸᐣ ᐃᒪ ᐊᑯᓯᐏᑲᒥᑯᐠ ᐅᓂᐯᐏᓂᐠ, ᐁᑲᑵ ᐃᑭᑎᐨ "ᑭᓴᑭᐦᐃᐣ," ᑲᒷᔦ ᐃᔕᐨ ᐃᒪ ᐊᒐᑯ ᐊᐦᑭᐠ᙮
ᑲᑲᑵᑭᑫᐣᒋᑲᑌᐠ ᐊᓂᔑᓂᓂᒧᐏᐣ ᐊᓂᒪᐣ ᐁᑿ ᑎᐸᐦᐃᑫᓭ᙮ ᑕᐦᓱᓂᔓᑭᔑᑲ ᑲᔭᓄᓇᑯᔑᐠ ᓂᑯᑢᓱ ᐱᒥᑯᓇᑲ, ᓂᑭᐏᒋᑢ ᐊᔭᒥᐦᐃᑐᐏᓂᐠ ᐃᒪ ᒪᒪᑕᐘᐱᑯᐠ ᐃᒪ ᓂᑭᔑᑌᐳᑲᒥᑯᐠ ᒣᑿᐨ ᓂᓂᒐᓂᔕᐠ ᐁᐸᐸᒥᐸᐦᐃᑎᐘᐨ ᑌᑎᐸᐦᐃ ᐃᒪ᙮ ᐯᔑᑿ ᒥᓇ ᐊᐱᑕ ᑲᐘᑲᓭᐠ ᐁᑭᓇᓇᐱᑲᓇᐘᐸᑕᒪᓂᐣ , ᐅᑭᑲᑵᑭᑫᐣᑕᒪᓂᐣ, ᐁᑲᑭᑐᔭᐣ ᐁᑿ ᐁᒪᒪᓯᓇ ᐦᐊᒪᓂᐣ ᐊᓂᔑᓂᓂᒧᐏᐣ ᐃᑭᑐᐏᓇᐣ᙮ ᓂᑭᔑᔕᔑᑭᒥᑯᒥᐣ ᒋᐏᒋᑢᔭᐠ ᐁᑿ ᒋᐊᔭᒥᐦᐊᔭᐠ ᓂᑐᑭᑭᓄᐦᐊᒪᑫᒥᐊᐣ᙮ ᐁᓄᑕᒪᐣ ᐊᓂᔑᓂᓂᒧᐏᐣ ᐁᔭᐸᒋᒋᑲᑌᐠ ᐁᑿ ᐁᐃᓂᐍᒋᑲᑌᐠ ᒪᒪᑕᐘᐱᑯᐠ ᑭᐅᐡᑫᐣᑕᑿᐠ ᐁᑿ ᒧᒋᑫᐣᑕᑿᐣ ᐃᐍ ᑐᑕᒧᐏᐣ᙮
ᐊᔭᑭᐣ ᐃᑭᑐᐏᓇᐣ ᑲᔭᐡ ᓂᑭᒋᐦᐊᒥᓇᓇᐠ ᒋᓄᑕᑿᑭᐣ ᐃᒪ ᓂᑲᐯᔓᐏᐣᐠ ᐁᑿ ᒋᔭᓂᔕᒪᑲᑭᐣ ᐃᒪ ᓂᓂᒐᓂᔕᐠ ᐅᑕᐘᑲᐘᐠ ᑲᐏᐣ ᑕᑭᐊᒋᒋᑲᑌᓯᓄᐣ ᐃᐍ ᐸᑭᑎᓂᑫᐏᐣ᙮
ᐱᓯᐣᑕᐣ ᐃᐍ ᕑᐅᔐᓫ ᑊᕑᐊᐠ ᐅᒪᒪᒪᐣ, ᓫᐃᐣᑕ, ᐏᑕᒥᑎᓯ ᐊᓂᔑᓂᓂᒧᐏᓂᐠ᙮
ᑲᐃᔑᐸᑯᓭᓂᒧᔭᐣ ᒋᑭᑫᐣᑕᒪᐣ ᐊᓂᔑᓂᓂᒧᐏᐣ ᑭᐏᒋᐸᓯᑌᓭ ᐁᑿ ᓂᑎᔑᐘᐍᓇᐦᒋᑫ ᒋᐱᒥᑲᑵᑭᑫᐣᑕᒪᐣ᙮ ᓂᑭᑫᐣᑕᐣ ᑲᐃᔑᑲᑿᑕᑭᓭᐘᐨ ᐊᓂᔑᓂᓂᐘᐠ ᑲᐃᔑᐘᐸᑕᒧᐘᐨ ᐃᐍᓂ ᑲᐘᓂᐦᑐᐘᒋᐣ ᐅᑎᔑᑭᔑᐍᐏᓂᐘᐣ ᐁᑿ ᐅᑎᔑᐱᒪᑎᓱᐏᓂᐘᐣ ᐃᒪ ᑫᒍᐍ ᐅᑕᐦᑭᒥᐘᐠ᙮ ᓂᑭᑫᐣᑕᐣ ᐊᐣ ᓂᒪᒪ ᐅᑎᔑᑭᔑᐍᐏ ᐣ ᑲᑭᐏᒋᐘᓂᓭᓂᐠ ᒣᑿᐨ ᐁᑭᑲᑵ ᑎᐱᓇᐠ ᑭᑭᓄᐦᐊᒪᑫᐏᓂᓂ᙮ ᓂᑭᑫᐣᑕᐣ ᑫᑭᐏᒋ ᐁᑿ ᑌᐱᓂᑫᐏᓇᐣ ᑲᑭᐏᒋ ᒥᓂᑯᔭᐠ ᐃᐍᓂ ᑲᑭᑐᑕᐠ᙮ ᓂᑭᑫᐣᑕᐣ ᓂᓂᐡᑕᒼ ᐁᑲᓇᐘᐸᒥᑯᓯᔭᐣ ᒋᑲᑵᑭᑫᐣᑕᒪᐣ ᐃᐍᓂ ᐅᑎᔑᑭᔑᐍᐏᐣ᙮
ᓂᐱᒥᐡᑲ ᐅᒪ ᐃᔑᑭᔑᐍᐏᐣ ᐱᒥᐡᑲᐏᓂᐠ ᐃᑵᓂᐘᐠ ᐅᒋ ᓂᑕᔑᓂᓂᒪᐠ, ᓂᓂᒐᓂᔕᐠ, ᓂᒥᔓᒼ, ᐁᑿ ᒪᐘᐨ ᐊᐍ, ᓂᒪᒪ᙮
ᑭᑕᔭᐣ ᓇ ᑲᑭᒋᐣᑕᑿᐠ ᑭᐣ ᑎᐱᓇᐍ ᑎᐸᒋᒧᐏᐣ ᑫᑭᐏᒋ ᐱᒋᑫᒪᑲᐠ ᓂᐦᓯᑐᑕᒪᑫᐏᐣ ᓇᐣᑕ ᑫᐏᒋᐏᒋᐦᐃᑯᐘᒋᐣ ᑯᑕᑭᔭᐠ ᐊᐏᔭᐠ? ᑭᐏᓄᑕᑯ᙮ ᐅᐍ ᑭᔭᐱᐨ ᐏᑕᒪᑫᐏᓇᐣ ᐊᐣ ᑫᑭᐏᒋ ᐏᑕᒪᐏᔑᔭᐠ more info on how to pitch to us᙮
ᕑᐅᔐᓫ ᐘᐸᐣ ᑊᕑᐊᑭᒪ ᐅᒋᑎᐯᐣᑕᑯᓯ ᐘᒐᐡᑯᑯᓂᒥᐠ ᐊᓂᐦᐃᓂᓂᐏ ᐅᑯᒪᐏᓇᐠ ᐁᑿ ᒣᑿᐨ ᐃᔑᑲᐯᔑ ᐃᒪ ᒥᓯᓴᑲ, ᐅᐣᑌᕑᐃᐅ, ᐁᐏᒋᔭᒪᒋᐣ ᐅᑎᐯᐣᒋᑫᐏᐣ᙮ ᐊᓂᔑᓂᓂᐏᑵᐏ ᐁᑿ ᑲᔦ ᓹᐢ-ᑭᕑᒪᐣ᙮ ᐃᒪ ᑕᐡ ᑕᓇᓄᐦᑭ ᑲᐏᐣ ᔓᓂᔭᑫᐏᓂᐠ ᐏᒋᐦᐃᐍᐏᓂᐠ ᑲᐏᑕᓄᐦᑭᒥᑎᓂᐨ ᐊᓂᔑᓂᓂᐏ ᐅᑯᒪᐏᓇᐣ ᐃᒪ ᐟᕑᐃᑎ 3 ᑲᑲᑵᑕᐱᑕᐏᓇᒧᐘᒋᐣ ᑭᑭᓄᐦᐊᒪᑫᐏᓂᐠ ᐃᑵᓂᐘᐣ ᐊᓂᔑᓂᓂᐏ ᐅᒋ ᐅᐡᑲᑎᓴᐣ ᙮